معليش؟

معليش إذا بعد يلّي صار
سافرت من دون ما ودّعك؟
بفزع لا قلبي يكسر القرار
ولاقيه تاركني وباقي معك

معليش إذا سكّرت خطّي
وما عدت ردّ عليك لمّا تدقّ؟
بفزع لا غفلة يخونني صوتي
ويصير يترجّى قلبك يرقّ

معليش إذا حاولت أنسى
شو كنّا رح منصير لو ما روح؟
بفزع الحاضر يجحف ويقسى
وينكش من الماضي اللي راح جروح

معليش إذا طلعت لبرّا
وبقّيت صوتي نايم بقلبك؟
معليش إذا ولآخر مرّة
ضمّيتك وقلتلّك ‏بحبّك

يا ريت

لو فيّي أقطف دمعة من غيمة صحو
وأسقي شفافك منها تيزهّر الورد
يمكن سكوتك يسكب حكي مطرحو
والدفا يسلحب مطرح الكاين البرد

يا ريت فيّي، ولنّو شي شويّة
تصير الدني لعبة بإيديّي
وأسرقلك دموع الشتي بتشرين
يا ريت بقدر، بس ما فيّي

لو فيّي أسرق لمعة من نجمة سهيل
وشعشع عيونك منها تتشرق الشمس
يمكن خيطان نهارك تلبّس الليل
وتضوّي ع كمشة اسرار انرمت همس

يا ريت فيّي، ولنّو شي شويّة
تصير الدني لعبة بإيديّي
ولوّنها متل عيونك الحلوين
يا ريت بقدر، بس ما فيّي

لو فيّي أخطف شمعة من عمر الدني
وخبّيها بين حروف محرّكة بسكون
يمكن اللحظة تصفّي شي ميّة سنة
وأنت وأنا، مع بعضنا نقدر نكون

يا ريت فيّي، ولنّو شي شويّة
تصير الدني لعبة بإيديّي
وأكتب قوافي تغنّيا حساسين
يا ريت بقدر، بس ما فيّي

طلعنا غلطانين

سكتوا الأغاني
وانطفيت الألحان
بهتوا المعاني
ومرّ علينا الزمان

قلنا قدرنا
نبقى مع بعض سنين
هيك افتكرنا
شو طلعنا غلطانين

صعبة بقى نعيد اللي كان
خلّي البكي يغرّق عينينا
صورنا المليانة ألوان
نحن سوّدناها بإيدينا

خلصوا القوافي
ودبلت معا الأشعار
وصوتك الدافي
صار ببردي يحتار

قلنا قدرنا
نبقى مع بعض سنين
هيك افتكرنا
شو طلعنا غلطانين

صعبة بقى نلغي اللي صار
خلّي البكي يغرّق عينينا
قصّتنا المكتوبة بالنّار
نحن طَفيناها بإيدينا